Faschingswong 2010

De ersten Umzüge hom mia Pobenhausener Festdamen bereits mit Bravour hinter uns brocht. Allerdings ned in unser'm scheena Kleidl – sondern im Scheichkostüm. Grund dafür: Der Gaudiwurm in Adelshausen und der Faschingsumzug in Waidhofen im Februar 2010. Zwoa superscheene Dog homma unter dem Motto "Geisterstadt Dubai – Wir sind abgebrannt" ausgelassen gfeiert und de Zuschauer von nah und fern an guadn Vorgeschmack gem, dass Pobenhausen einiges zu bieten hod.

As Ergebnis vo an Haufa Arbad hod si echt seng lass'n kinna und wieder amoi hod Pobenhausen bewiesen, dass echt zamhoidn. Beim Schreistetter Mane in da Halle is a baut worn, an Tieflader hod da Ilg Maddl ziemlich flott aufdriem. So war as Wichtigste scho gfunna.

Aber ohne an Reil Beda und an Ilg Maddl war des Ganze wahrscheinlich gor nix worn. Unermüdlich homs baut de Zwoa und sogar eanan Urlaub gopfert. Ned zum vergess'n nadürle unsere tatkräftigen Helfer vom Bochstüberl Pobenhausen und letztendlich mia Festdamen.

An dera Stelle mechtn uns mia Festdamen nomoi ganz herzlich bei unseren fleißigen Helfern bedanken, weil so vui Engagement is ois andere als selbstverständlich.

Zum Schluss ghead aber no geklärt: Woher kimmt eigentlich de Idee zum "närrischen Ausflug"? Fünf Festdamen war'n im Dezember 2009 im Metzgerbräu in Hohenwart und do is eana eigfoin, dass doch so a Faschingswong bestimmt a Rießengaudi war. Ob der Einfall aber von uns Mädels oder vui mehra vo de vier Meter Schnaps kemma is, kon ma jetz im Nachhinein nimmer so genau song. Fest steht jedenfois, dass boid wieder a Ausflug ins Metzgerbräu osteht. Und desmoi miass ma uns überleng, unter welchen "Vorwand" wir uns im nächsten Johr an Faschingswong bau'n lassn.

Festdamen, Bochstüberl und Festausschuss – beste Stimmung auf dem Wagen in der Dorfrundfahrt.